МОНГОЛ, ВЕНЕСУЭЛИЙН ГАДААД ХЭРГИЙН ЯАМД ХООРОНДЫН ХАМТЫН АЖИЛЛАГААНЫ ТУХАЙ САНАМЖ БИЧИГТ ГАРЫН ҮСЭГ ЗУРАВ

Монгол Улсын Гадаад харилцааны дэд сайд Б.Батцэцэг, Боливарын Бүгд Найрамдах Венесуэл Улсын Гадаад хэргийн дэд сайд Феликс Рамон нар 2017 оны 5 дугаар сарын 16-нд хоёр улсын ГХЯ-д хооронд улс төрийн зөвлөлдөх механизм байгуулах тухай харилцан ойлголцлын Санамж бичигт гарын үсэг зурав.

Тус баримт бичгийг байгуулснаар талууд хоёр талын болон олон талт хамтын ажиллагааг хөгжүүлэх, ялангуяа улс төр, эдийн засаг, соёл, шинжлэх ухаан, боловсрол, спорт болон хүний хөгжлийн асуудлаар зөвлөлдөж ярилцах боломж нээгдэж байгаа юм.

Мөн Гадаад хэргийн дэд сайд нар хоёр улсын харилцааны талаар санал солилцож, Санамж бичигт тусгасан хамтын ажиллагааны салбар чиглэлүүдийг ажил хэрэг болгохын төлөө хамтран ажиллахаа харилцан нотлов.

Гарын үсэг зурах ёслолд Монгол Улсаас БНХАУ-д суугаа Элчин сайд Д.Ганхуяг, Боливарын Бүгд Найрамдах Венесуэл Улсаас Монгол Улсад хавсран суух Элчин сайд Иван Зерпа Гуэрэро нар байлцав.