ТӨРИЙН НАРИЙН БИЧГИЙН ДАРГА Д.ДАВААСҮРЭН БРИТАНИЙН ГАДААД БОЛОН ХАМТЫН НӨХӨРЛӨЛИЙН ХЭРГИЙН ЯАМНЫ АЗИ НОМХОН ДАЛАЙН ГАЗРЫН ЗАХИРЛЫГ ХҮЛЭЭН АВЧ УУЛЗАВ

Монгол Улсад ажлын айлчлал хийж буй Британийн Гадаад болон Хамтын Нөхөрлөлийн Хэргийн Яамны Ази, Номхон далайн газрын захирал хатагтай Кейт Уайтыг ГХЯ-ны Төрийн нарийн бичгийн Д.Даваасүрэн 6 дугаар сарын 6-ны өдөр ГХЯ-нд хүлээн авч уулзаж, хоёр орны харилцаа, хамтын ажиллагааны өнөөгийн байдал, цаашид хэрэгжүүлэх арга хэмжээ, харилцан сонирхсон бүс нутгийн болон олон улсын харилцааны зарим асуудлаар санал  солилцлоо.

Уулзалтын үеэр сайд Д.Даваасүрэн Монгол, Британийн найрсаг харилцаа, хамтын ажиллагааг бүхий л салбарт өргөжүүлэх, хоёр талын худалдаа, хөрөнгө оруулалтыг нэмэгдүүлэх чиглэлээр хамтын ажиллагааг үргэлжлүүлэх сонирхлоо илэрхийлэв.  Д.Даваасүрэн Өрнөдийн улс орнуудаас хамгийн анх Монгол Улстай дипломат харилцаа тогтоосон ИБУИНХУ-тай найрсаг харилцаа сүүлийн жилүүдэд эрчимтэй хөгжиж, улс төр, худалдаа, эдийн засаг, соёл боловсрол, хүмүүнлэг, байгаль хамгаалал зэрэг салбарт хамтын ажиллагаа өргөжиж байгааг тэмдэглэв.

Хатагтай Кейт Уайт Монгол Улс бүс нутгийн тулгамдсан асуудлыг шийдвэрлэхэд хувь нэмрээ оруулах, Зүүн хойд Азид энх тайван, тогтвортой байдлыг бэхжүүлэх, аюулгүй байдлын хамтын ажиллагааг өргөжүүлэх хүрээнд “Зүүн хойд Азийн аюулгүй байдлын асуудлаарх Улаанбаатарын яриа хэлэлцээ” санаачилгыг 2013 оноос эхлэн идэвхтэй хэрэгжүүлж ирсэнийг өндрөөр үнэлж буйгаа мэдэгдэв. Тэрээр тус бага хурлын хаалтын хуралдаанд оролцсон байна.