Skip to content
- Гадаадад зорчиход анхаарах зүйлс        - Монголын иргэд хилийн чанадад зорчих визийн нөхцөл        - Visa application form       
Та энд байна: Нүүр хуудас

ЕРӨНХИЙЛӨГЧ Ц.ЭЛБЭГДОРЖИЙН ЯПОН УЛСАД ХИЙХ АЖЛЫН АЙЛЧЛАЛ ЭХЭЛЛЭЭ ... read more

Л.ПҮРЭВСҮРЭН, ЖАН ЯН НАР САНАМЖ БИЧИГТ ГАРЫН ҮСЭГ ЗУРАВ ... read more

МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖ, ЯПОН УЛСЫН ЕРӨНХИЙ САЙД ШИНЗО АБЭ НАР ХЭЛЭЛЦЭЭ ХИЙЖ, СЭТГҮҮЛЧДЭД МЭДЭЭЛЭЛ ХИЙВ ... read more

МОНГОЛ УЛС, МАРШАЛЛЫН АРЛУУДЫН БҮГД НАЙРАМДАХ УЛСТАЙ ДИПЛОМАТ ХАРИЛЦАА ТОГТООХ ХАМТАРСАН АЛБАН МЭДЭЭНД ГАРЫН ҮСЭГ ЗУРАХ ЁСЛОЛЫН АЖИЛЛАГААНД ОРОЛЦЛОО ... read more

ХОЁР УЛСЫН ЕРӨНХИЙ САЙД НАР УУЛЗАЛТ ХИЙЛЭЭ ... read more
by camp26
2015 оны 5-р сар

2015 оны 5-р сарын 26

ДУРСАМЖИЙН УУЛЗАЛТ БОЛЛОО PDF Хэвлэх Email
Бичсэн admin
2015 оны 5-р сарын 26, Мягмар гариг, 17:12

Гадаад хэргийн яамнаас гадаад харилцааны салбарт он удаан жил ажиллаж, салбарын хөгжилд үнэтэй хувь нэр оруулсан ахмад диломатуудынхаа мэндэлсний их тэгш ойг тэмдэглэдэг уламжлалтай болоод байна. Энэ онд бид төр нийгмийн нэрт зүтгэлтэн, Онц бөгөөд бүрэн эрхт Элчин сайд Б.Жаргалсайхан, Д.Цэвэгмид нарын мэндэлсний 100 жилийн ойг тэмдэглэн өнгөрүүлсэн. Гадаад явдлын яамны сайдаар ажиллаж байсан Лувсандоржийн ТОЙВЫН мэндэлсний 100 жилийн ойд зориулан ДУРСАМЖИЙН УУЛЗАЛТ-ыг 2015 оны 5 дугаар сарын 25-ны өдөр зохион байгуулав.

Л.Тойв гуай 1953 оноос дипломат албанд шилжин ажиллаж Монгол Улсаас ЗСБНХУ, БНХАУ-д суугаа ЭСЯ-нд зөвлөх, ГЯЯ-нд хэлтсийн даргаар дэвшин ажиллажээ. 1964 онд Москва хотод Дипломатын академийг төгссөнийхөө дараа НҮБ-ын дэргэд суугаа Байнгын төлөөлөгчөөр томилогдон ажиллаж

1966-1968 онд ГЯЯ-ны нэгдүгээр орлогч сайд, 1968-1970 онд ГЯЯ-ны сайдын албыг хашжээ. Түүнийг ГЯЯ-ны сайдаар ажиллаж байх хугацаанд МУ-ын гадаад харилцаа улам өргөжиж Дани, Турк, Сингапур, Төв Африк, Итали, Судан, Марокко зэрэг улстай дипломат харилцаа тогтоож, Япон улстай дипломат харилцаа тогтоох тухай хэлэлцээ Москва хотноо явагдаж байжээ. Тэрбээр 1964 онд Онц бөгөөд бүрэн эрхт Элчин сайд цол хүртсэн юм.

Уулзалтыг нээж ГХ-ийн дэд сайд Н.Оюундарь үг хэлж, “Дипломат албаны нэрт зүтгэлтэн Л.Тойв” гэсэн илтгэлийг Д.Баярхүү, “Цэргийн түүх судлалд Л.Тойвын оруулсан хувь нэмэр” илтгэлийг БХЯ-ны Түүхийн хүрээлэнгийн ЭША, доктор, хурандаа О.Ганболд, “Зохиолчдын хорооны дарга Л.Тойв” гэсэн илтгэлийг Зохиолч, яруу найрагч Г.Аюурзана нар тавив.

Уулзалт дээр ахмад дипломат, Гадаад явдлын яамны орлогч сайд асан, ОББЭЭС Г.Дашдаваа, ОБББЭ Я.Дашням, Гадаад харилцааны тэргүүн дэд сайд асан, ОББЭЭС Ж.Чойнхор, Л.Тойв агсны ах дүү Д.Гомбодорж нарын зэрэг хүмүүс үг хэлэв.


Сүүлд шинэчлэгдсэн ( 2015 оны 5-р сарын 26, Мягмар гариг, 17:15 )

“МЕНЕЖЕР ДАВТАН СУРГАХ ХӨТӨЛБӨР”-ИЙН ЗОХИЦУУЛАХ ХОРООНЫ ГУРАВДУГААР ХУРАЛ БОЛЛОО. PDF Хэвлэх Email
Бичсэн admin
2015 оны 5-р сарын 26, Мягмар гариг, 17:08

ХБНГУ-ын Берлин хотноо энэ оны 5 дугаар сарын 7-ны өдөр ХБНГУ-ын Эдийн засаг, эрчим хүчний яам, Монгол Улсын Гадаад хэргийн яамтай хамтран хэрэгжүүлж буй “Менежер давтан сургах хөтөлбөр”-ийн зохицуулах хорооны гуравдугаар хурал боллоо. Хуралд тус зохицуулах хорооны Германы талын дарга, ХЭЗЭХЯ-ны газрын дэд дарга Андреас Оберштеллэр, Монголын талын дарга, ГХЯ-ны Эдийн засгийн хамтын ажиллагааны газрын захирал Ё.Манлайбаяр, Элчин сайд Ц.Болор болон албаны бусад хүмүүс оролцлоо. Уг хөтөлбөрийг 2009 оноос Монгол Улсад хэрэгжүүлж байгаа ба Монголын хувийн хэвшлийн аж ахуйн нэгж, компаниудын менежерүүдийг 4 долоо хоногийн хугацаанд ХБНГУ-д сургаж, лекц, дадлагыг хослуулах замаар германы хувийн хэвшлийн бизнес эрхлэх арга зүй, инновацийн хөгжилтэй танилцуулж, улмаар монгол менежерүүдийн өрсөлдөх чадварыг нэмэгдүүлэн, цаашид германы талтай хамтран ажиллах боломж, нөхцлийг бүрдүүлэх зорилготой юм. Хөтөлбөрийг Монголын талаас Ажил олгогч эздийн нэгдсэн холбоо, Германы талаас Германы олон улсын хамтын ажиллагааны нийгэмлэг хэрэгжүүлдэг бөгөөд МАОЭНХ-ны дэд ерөнхийлөгч Х.Ганбаатар, тус хөтөлбөрийн удирдагч Раймут Дюринг нар оролцож, тайлангийн хугацаанд авч хэрэгжүүлсэн арга хэмжээний талаар танилцуулав. Сургалт, хөтөлбөрийн үр дүнг сайжруулах зорилгоор оролцогч менежерүүдэд тавигдах шаардлагыг өндөржүүлж, ажил олгогч эздийн эрэлт, хэрэгцээнд үндэслэж хөтөлбөрийг хэрэгжүүлэхэд анхаарч ажилласныг талууд онцолж байв. Хөтөлбөрийн хүрээнд 2009 оноос хойш нийт 230 менежер сургалтад хамрагдаад байна.
Энэ удаагийн хуралдаанаар хөтөлбөрт хамрагсдын тоог цаашид нэмэгдүүлэх, 2016 онд хөтөлбөрийн хугацаа дуусгавар болж байгаатай холбогдуулан үргэлжлүүлэн сунгах, мөн хөтөлбөрийн хүрээнд хөдөө аж ахуй, банк санхүү, эрчим хүч, нэн ялангуяа сэргээгдэх эрчим хүчний салбарыг нэмж хамруулах талаар харилцан тохиролцож шийдвэрлэлээ.


Сүүлд шинэчлэгдсэн ( 2015 оны 5-р сарын 26, Мягмар гариг, 17:27 )

ТИКА-ГИЙН ТӨСЛИЙН НЭЭЛТ БОЛОВ PDF Хэвлэх Email
Бичсэн admin
2015 оны 5-р сарын 26, Мягмар гариг, 17:05

Туркийн олон улсын хамтын ажиллагааны агентлаг (ТИКА)-ийн гадаад орнуудад хэрэгжүүлсэн зарим төслийн нээлтийн ёслол 2015 оны 5 сарын 7-нд Анкара хотноо болж, тус агентлагийн захирал С.Жам, БНТУ-ын Ерөнхий сайдын орлогч Н.Куртулмуш нар Кыргыз, Мьянмар, Пакистан, Монгол, Палестин, Косовод хэрэгжүүлсэн төслүүдийг танилцуулав.

Тус ёслол дээр БНТУ-ын Ерөнхийлөгч Р.Т.Эрдоан үг хэлэхдээ Улаанбаатар хотын ойролцоо Түрэгийн мэргэн Тоньюкукийн хөшөө хүрэх 11 км засмал замыг 2014 онд дуусгасан, мөн өмнө нь Хархорин хотоос Билгэ хаан, Күльтегин жанжины гэрэлт хөшөө хүртэлх 45 км засмал зам тавьсан нь өвөг дээдсийнхээ түүх дурсгалыг хүндэтгэх, олон нийтэд үзүүлж сурталчлахад чухал ач холбогдолтой болсныг онцлон тэмдэглэв.Дараа нь БНТУ-ын Ерөнхийлөгч Р.Т.Эрдоан, Монгол Улсаас БНТУ-д суугаа Онц бөгөөд Бүрэн эрхт элчин сайд Б.Батхишиг нар Туркийн Засгийн газар, парламентын зарим гишүүдийн хамт Мэргэн Тоньюкукийн хөшөө хүрэх засмал зам нээгдсэнийг албан ёсоор зарлав. Мөн уг хөшөөний тэнд музей байгуулах зөвшөөрөл олгох хүсэлтийг уламжилж өгөхийг Ерөнхийлөгч Р.Т.Эрдоан элчин сайд Б.Батхишигээс хүслээ.

Элчин сайд Б.Батхишиг Ерөнхийлөгч Р.Т.Эрдоанд талархал илэрхийлээд монгол, турк хэл дээр хэвлүүлсэн “Монгол, Туркийн харилцааны хөгжил” номыг бэлэглэв.


“МОНГОЛЫН ИЛ ХААНТ УЛСЫН ТУРКТ ҮЗҮҮЛСЭН НӨЛӨӨ” СЭДЭВТ ЭРДЭМ ШИНЖИЛГЭЭНИЙ ХУРАЛ БОЛОВ PDF Хэвлэх Email
Бичсэн admin
2015 оны 5-р сарын 26, Мягмар гариг, 17:02

Анкара хот дахь Кочийн их сургууль 2015 оны 5 сарын 21-нд  “Монголын Ил хаант улсын Туркт үзүүлсэн нөлөө” сэдэвт эрдэм шинжилгээний хурал зохион байгуулж, Турк, Америк, Их Британи, Кипр, Монголын 10 гаруй их сургуулийн эрдэмтэн судлаачид илтгэл тавьж хэлэлцүүлэв.
Эрдэм шинжилгээний хурлыг Кочийн их сургуулийн судалгааны төвийн захирал, доктор, профессор Филиз Иенишехирлиолу, Туркийн Соёл, аялал жуулчлалын яамны Төрийн нарийн бичгийн дарга, доктор, профессор Халук Дурсун нар нээж үг хэлэв.
Тус хурал дээр Монгол Улсаас БНТУ-д суугаа Онц бөгөөд Бүрэн эрхт Элчин сайд, доктор Б.Батхишиг, Анкарагийн их сургуулийн докторант, түүхч Д.Анхбаяр нар “Монголын Ил хаант улсын түүх, соёлтой холбоотой Турк дахь зарим газар, дурсгалт зүйлс” номыг танилцуулж, эрдэмтэн судлаачдад гардуулав.Элчин сайд Б.Батхишиг баяр хүргэж хэлсэн үгэндээ профессор Х.Дурсун Топкапи ордон музейн захирал байхдаа “Судрын чуулганы” эх хувийг цахим хэлбэрээр Монгол Улсын Ерөнхийлөгч Ц.Элбэгдоржид өгч, Монголын  түүх, соёлыг сурталчлахад чухал хувь нэмэр оруулсныг онцлон тэмдэглээд Анкара дахь Монгол Улсын Элчин сайдын яам уг алдарт бүтээлийг нэг хувь хэвлүүлж Ерөнхийлөгчид өргөн барьсныг дурьдав.
Үдээс өмнөх хуралдаанд Анкарагийн их сургуулийн доктор, профессор Илхан Эрдэм “Ил хаант улсын Туркт үзүүлсэн нөлөө”, Их Британийн Сэйнт Андрюсийн их сургуулийн доктор Андрею Реакок “Ил хаант улсын үеийн Турк дахь исламын шашин” сэдэвт илтгэлүүдийг тавьж хэлэцүүлэв.
Хурлын завсарлагаанаар эрдэмтэн судлаачид, оюутан залуус монгол гэрт зочилж, Монголын тухай үзэсгэлэн үзэв.


МОНГОЛ, ТУРКИЙН БАТЛАН ХАМГААЛАХЫН САЙД НАР УУЛЗАВ PDF Хэвлэх Email
Бичсэн admin
2015 оны 5-р сарын 26, Мягмар гариг, 16:57

Монгол Улсын Их Хурлын гишүүн, Батлан хамгаалахын сайд Ц.Цолмон 2015 оны 5 дугаар сарын 6-ны өдөр Бүгд Найрамдах Турк Улсын Батлан хамгаалахын сайд Исмет Иылмазтай Истанбул хотноо уулзаж ярилцав.
Сайд Ц.Цолмон хоёр улсын батлан хамгаалах салбарын хамтын ажиллагаа амжилттай хөгжиж байгааг тэмдэглээд, цаашид Туркт суралцах цэргийн албан хаагчдын тоог нэмэгдүүлэх, батлан хамгаалах аж үйлдвэрийн хамтын ажиллагааг өргөтгөх, Туркээс манай зэвсэгт хүчинд үзүүлж буй буцалтгүй тусламжийн хэмжээг нэмэгдүүлэх хүсэлтэй байгаагаа илэрхийлэв. Мөн сайд Ц.Цолмон Эдийн засаг, худалдааны Монгол, Туркийн Засгийн газар хоорондын хамтарсан хорооны Монголын хэсгийн даргын хувьд Хархорины нисэх буудлыг шинэчлэх, аялал жуулчлалыг хөгжүүлэхэд туслалцаа үзүүлэхийг туркийн талаас хүсэв.Сайд Исмет Иылмаз Туркт суралцах Монголын цэргийн албан хаагчдын тоог нэмэгдүүлэх боломжтойг дурьдаад, манай зэвсэгт хүчинд үзүүлэх тусламжийн хэмжээг нэмэгдүүлэх асуудлыг судалж үзэхээ илэрхийлэв. Мөн Хархорины нисэх буудлыг шинэчлэх төсөл, тооцоог хийж туркийн талд өгөхийг зөвлөв.
Сайд Ц.Цолмон Истанбул хотод нээгдсэн Олон улсын батлан хамгаалах аж үйлдвэрийн үзэсгэлэнг үзэж, Монголд цэргийн бүтээгдэхүүн нийлүүлдэг зарим компанийн удирдлагатай уулзаж ярилцав.
Сайд Ц.Цолмон, Исмет Иылмаз нар Батлан хамгаалах аж үйлдвэрийн салбарт хамтран ажиллах тухай Монгол, Туркийн Засгийн газар хоорондын хэлэлцээрт гарын үсэг зурав.
Уулзалт болон гарын үсэг зурах ёслолд Монгол Улсаас Бүгд Найрамдах Турк Улсад суугаа Онц бөгөөд Бүрэн Эрхт Элчин сайд Б.Батхишиг, Истанбул хотод суугаа Ерөнхий консул Э.Мөнх-Очир нар болон Батлан хамгаалах яамны албаны бусад хүмүүс оролцов.


Л.ПҮРЭВСҮРЭН, ЖАН ЯН НАР САНАМЖ БИЧИГТ ГАРЫН ҮСЭГ ЗУРАВ PDF Хэвлэх Email
Бичсэн admin
2015 оны 5-р сарын 26, Мягмар гариг, 09:29

Гадаад хэргийн сайд Л.Пүрэвсүрэн, Ази-Европын сангийн Гүйцэтгэх захирал Жан Ян нар Монгол Улсын Гадаад хэргийн яам Ази-Европын сангийн хооронд хамтран ажиллах тухай Санамж бичигт гарын үсэг зурав.

Уг санамж бичгийн зорилго нь АСЕМ-ийн 11 дэх удаагийн Дээд хэмжээний уулзалт болон түүний бусад дагалдах арга хэмжээг 2016 онд Улаанбаатар хотноо зохион байгуулахад Ази-Европын сангаас дэмжлэг үзүүлэн Гадаад хэргийн яамтай хамтран ажиллахад оршиж буй юм.

Ази-Европын сан нь АСЕМ-ийн байнгын ажиллагаатай ганц байгууллага бөгөөд хоёр тивийн ард түмний найрамдал, харилцан ойлголцлыг гүнзгийрүүлэх зорилготойгоор 1997 онд Сингапурт байгуулагдсан. Тус сан нь оюуны солилцоо, иргэд хоорондын солилцоо, соёлын солилцоо, олон нийттэй харилцах харилцааг дэмжих гэсэн 4 үндсэн чиглэлээр үйл ажиллагаа явуулдаг. Ази-Европын сан нь AСЕМ-ийн гишүүн орнуудын Засгийн газар, хувийн хэвшлийнхний хандиваар санхүүждэг юм.

Сүүлд шинэчлэгдсэн ( 2015 оны 5-р сарын 26, Мягмар гариг, 09:31 )


2015 оны 5-р сарын 25

ЕРӨНХИЙЛӨГЧ Ц.ЭЛБЭГДОРЖИД ЯПОН УЛСЫН ПАРЛАМЕНТЫН ЗӨВЛӨХҮҮДИЙН ТАНХИМ ДАХЬ ЯПОН,МОНГОЛЫН НАЙРАМДЛЫН БҮЛГИЙН ДАРГА С.ЭДА БАРААЛХАВ PDF Хэвлэх Email
Бичсэн admin
2015 оны 5-р сарын 25, Даваа гариг, 13:31

Япон улсад ажлын айлчлал хийж байгаа Монгол Улсын Ерөнхийлөгч Цахиагийн Элбэгдоржид Япон Улсын Парламентын Зөвлөхүүдийн танхим дахь Япон,Монголын найрамдлын бүлгийн дарга С.Эда бараалхав.

Монгол Улсын Ерөнхийлөгчийн зүгээс хоёр орны хамтын ажиллагаа бүхий л түвшинд өргөжин хөгжиж байгаа нь хоёр улсын парламент хоорондын идэвхитэй хамтын ажиллагаа чухал үүрэг гүйцэтгэж байгааг онцоллоо. Эдийн засгийн түншлэлийн хэлэлцээр хоёр засгийн газрын хамтын хүчин чармайлтаар байгуулагдаж,Монгол Японы парламентаар батлагдсанд баяртай байгаагаа илэрхийллээ.

Япон Улсын Парламентын Зөвлөхүүдийн танхим дахь Япон,Монголын найрамдлын бүлгийн дарга С.Эда Эрхэм Ерөнхийлөгчийн Япон улсад хийж буй айлчлал амжилттай болж буйг дурдаад өнгөрсөн хугацаанд Монгол Японы харилцаа хамтын ажиллагаа маш идэвхтэй хөгжиж байгаа нь энэхүү айлчлалаас бас харагдаж байна. Эдийн засгийн түншлэлийн хэлэлцээр хоёр орны цаашдын хамтын ажиллагааны цоо шинэ шатыг нээж байна гэж бид харж байна гэж хэлээ.

Монгол Улсын Ерөнхийлөгч Цахиагийн Элбэгдорж ажлын айлчлалынхаа хүрээнд Японы эдийн засгийн мэдээллийн нөлөө бүхий томоохон байгууллагад тооцогдох “Никкей” сонин болон Японы гол таван телевизийн нэг “BS Fuji Prime news” шууд нэвтрүүлэгт оролцов.

Сүүлд шинэчлэгдсэн ( 2015 оны 5-р сарын 25, Даваа гариг, 13:35 )

БРАЗИЛД МОНГОЛЫН АЯЛАЛ ЖУУЛЧЛАЛЫГ СУРТАЛЧЛАХ АРГА ХЭМЖЭЭ БОЛОВ PDF Хэвлэх Email
Бичсэн admin
2015 оны 5-р сарын 25, Даваа гариг, 12:53

“Монголд тавтай морилно уу” сэдэвт монголын аялал жуулчлалын салбарыг сурталчлах арга хэмжээг Монгол Улсаас Холбооны Бүгд Найрамдах Бразил Улсад суугаа Элчин сайдын яам, Сан Пауло хот дахь Монгол Улсын Өргөмжит консулын газартай хамтран Сан Пауло хотноо 2015 оны 5 дугаар сарын 15-нд анх удаагаа зохион байгуулав.

Уг арга хэмжээний үеэр Монголын “Жуулчин” корпорацын төлөө0041 лөгчид Монгол Улсын аялал жуулчлалын салбарын талаар дэлгэрэнгүй танилцуулга хийв. Түүнчлэн Транс-Сибирийн төмөр замын чиглэлд аялал зохион байгуулдаг Бразилийн “AVIATRIX” компанийн гүйцэтгэх захирал П.Ирина ОХУ-аар дамжин Монгол Улс руу хийж болох боломжит аялалын талаар танилцуулга хийв.

Уг арга хэмжээнд бразилийн аялал жуулчлалын 34 компанийн төлөөлөл хүрэлцэн ирсэн бөгөөд дээрх компанийн төлөөлөгчид Монгол Улстай аялал жуулчлалын хамтын ажиллагааг хөгжүүлэх сонирхлоо илэрхийлсэн байна.

Сүүлд шинэчлэгдсэн ( 2015 оны 5-р сарын 25, Даваа гариг, 12:55 )

МОНГОЛ УЛС, МАРШАЛЛЫН АРЛУУДЫН БҮГД НАЙРАМДАХ УЛСТАЙ ДИПЛОМАТ ХАРИЛЦАА ТОГТООХ ХАМТАРСАН АЛБАН МЭДЭЭНД ГАРЫН ҮСЭГ ЗУРАХ ЁСЛОЛЫН АЖИЛЛАГААНД ОРОЛЦЛОО PDF Хэвлэх Email
Бичсэн admin
2015 оны 5-р сарын 25, Даваа гариг, 08:06

Монгол Улсын Ерөнхийлөгч Цахиагийн Элбэгдорж, Маршаллын Арлуудын Бүгд Найрамдах Улсын Ерөнхийлөгч Кристофер Лоэк нар Монгол Улс, Маршаллын Арлуудын Бүгд Найрамдах Улс хоорондын дипломат харилцаа тогтоох тухай хамтарсан албан мэдээнд гарын үсэг зурах ёслолын ажиллагаанд оролцлоо.

Монголын талаас Гадаад хэргийн сайд Л.Пүрэвсүрэн, Маршаллын Арлуудын Бүгд Найрамдах Улсын талаас Гадаад хэргийн сайд Тони Брам нар гарын үсэг зурлаа.

Монгол Улсын зүгээс НҮБ-ын гишүүн 198 оронтой дипломат харилцаа тогтоох зорилт тавин ажиллаж байгаа юм. Өнөөдрийн байдлаар НҮБ-ын 198 гишүүн орны 189 оронтой дипломат харилцаа тогтоогоод байгаа аж.

Сүүлд шинэчлэгдсэн ( 2015 оны 5-р сарын 25, Даваа гариг, 08:10 )

ЕРӨНХИЙЛӨГЧ ЦАХИАГИЙН ЭЛБЭГДОРЖИД АЗИ, НОМХОН ДАЛАЙН “РИЦҮМЭЙКАН” ИХ СУРГУУЛИЙН “ХҮНДЭТ ДОКТОР” ЦОЛ ГАРДУУЛЛАА PDF Хэвлэх Email
Бичсэн admin
2015 оны 5-р сарын 25, Даваа гариг, 08:00

Монгол Улсын Ерөнхийлөгч Цахиагийн Элбэгдоржид Ази, Номхон далайн “Рицүмэйкан” их сургуулийн “Хүндэт доктор”-ын цол гардуулах ёслолын ажиллагаа боллоо.

Ази, Номхон далайн “Рицүмэйкан” Их сургуулийн захирал Ш.Коренага “Хүндэт доктор”-ын цолыг гардуулах ёслолын үеэр хэлсэн үгэндээ:

Ноён Ерөнхийлөгч өө,

Өнөөдөр Монгол Улсын Ерөнхийлөгч, Эрхэмсэг Ноён Цахиагийн Элбэгдорж Танд Рицүмэйкан Ази, Номхон далайн их сургуулийн Хүндэт Докторын цол олгож байгаа нь бидний хувьд асар их нэр төрийн хэрэг билээ.

“Эрх чөлөө, Энх тайван, Хүмүүнлэг ёс” гэсэн алсын хараа, үзэл санаанд үндэслэн байгуулагдсан Ази, Номхон далайн их сургууль нь нийт оюутнуудынхаа талаас илүү хувийг гадаадын улс орнуудаас сонгон шалгаруулж элсүүлдэг бөгөөд энэхүү зарчим нь Японд төдийгүй дэлхийн бусад их дээд сургуулиудад түгээмэл биш билээ. Манай сургууль үүсгэн байгуулагдсанаас хойш 15 жилийн хугацаанд төгссөн нийт 5800-аад оюутны 2500 нь дэлхийн 80 орноос иржээ. Манай сургуулийн олон ургальч сургалтын орчинг дэлгэрүүлэхэд хувь нэмрээ оруулсан нийт монгол оюутнуудад гүн талархал илэрхийлье.

Ази, Номхон далайн их сургууль 2000 онд үүсгэн байгуулагдсанаас хойш Монголын нийт 250 оюутан төгссөн бөгөөд одоогийн байдлаар Монгол улсаас ирсэн 25 оюутан суралцаж байна. Ази, Номхон далайн их сургууль нь Удирдлагын Академи, Монгол Улсын Их Сургууль, Монгол Улсын Шинжлэх Ухаан Технологийн Их Сургууль зэрэг Монголын гурван их, дээд сургууль, дөрвөн дунд сургуультай гэрээ байгуулан хамтран ажиллаж байна. Монголын Засгийн газраас оюутнуудаа байнга дэмжин ажилладагт гүнээ талархаж байна.

Ази, Номхон далайн их сургууль олон улсын тавцанд өрсөлдөхүйц боловсон хүчин бэлтгэхийг эрмэлздэг. Манай оюутнууд өөр хоорондын соёлын ялгааг хүлээн зөвшөөрч чаддаг, бусдын эрхийг хүндэлж чаддаг, хамтын хүчээр жигүүрлэж хүссэн зорилгодоо хүрч чаддаг, бүс нутгийн анд нөхдийнхээ хамтач сэтгэлээр үнэт зүйл бүтээж чаддаг “дэлхийн иргэд” юм.

Ерөнхийлөгч Цахиагийн Элбэгдоржийг бид “дэлхийн хүн” гэж үздэг. Тэрбээр ардчилсан хувьсгалыг 1990 онд энхийн замаар тэргүүлж, Монголд 70 жилийн турш ноёлсон коммунист дэглэмийг халахад онцгоё гавьяа байгуулсан билээ. Тэр үеэс хойш улс эх орондоо нийгэм, эдийн засгийн шинэчлэлийг эрчимжүүлэх олон даацтай асуудлыг санаачилж, удирдаж чиглүүлсээр байна.

Ерөнхийлөгч Цахиагийн Элбэгдоржийн дэвшүүлсэн эрхзүйт ёсыг дэмжин сайжруулах, нийгмийн эрх тэгш байдлыг баталгаажуулах, ядуурлыг бууруулах, авилгатай тэмцэх, төр засаг, боловсролын салбарт иргэдийн оролцоотой ардчиллыг хөгжүүлэх зэрэг нэн тэргүүний зорилт, шийдмэг алхамуудыг дэлхий дахинд сайшаан магтаж байна.

Байгаль дэлхийтэй ойр, нүүдэлчин ардын гэрт төрж өссөн болоод ч тэр үү Ерөнхийлөгч Цахиагийн Элбэгдорж байгаль хамгаалах асуудлыг идэвхитэй дэмжиж ажилладаг бөгөөд тун саяхан НҮБ-ын Байгаль орчны хөтөлбөрийн “Эх Дэлхийн Манлайлагч” шагналыг хүртжээ.

Ардчилсан орнуудын хамтын нийгэмлэгийг даргалагч орны хувиар, Ерөнхийлөгч Цахиагийн Элбэгдорж ардчилал хөгжсөн болон хөгжиж буй улс орнуудад чухал ач холбогдол бүхий олон санаачилгыг дэвшүүлсэн.

НҮБ-ын 66-р Ерөнхий Ассемблейд түүний дэвшүүлсэн Авлигыг үл тэвчих болон Ардчиллын боловсролыг түгээн дэлгэрүүлэх санаачлагуудын ач холбогдол хэзээ ч дундаршгүй юм. Эдгээр санаачилгуудыг дэлхийн улс орнуудын тэргүүнүүд нэгэн дуугаар дэмжихээ мэдэгдэж байв. Үүнээс харахад Ерөнхийлөгч Цахиагийн Элбэгдорж дэлхий нийтийн энхтайван, хөгжил дэвшлийн төлөөх Монгол улсын хүчин чармайлтанд Ази тив дэх ардчилал, боловсролын хөгжлийг нэн тэргүүний зорилтоо болгожээ.

Монгол Улсын Ерөнхийлөгч, Эрхэмсэг Ноён Цахиагийн Элбэгдорж Танд чин сэтгэлийн угаас гүн талархал дэвшүүлж, эрхэм танаа Рицүмэйкан Ази, Номхон далайн их сургуулийн Хүндэт Докторын цол олгох хүндтэй үйлсийг биелүүлж байгаадаа маш их бахархаж буйг дахин илэрхийлсү.” гэж хэллээ.

Ерөнхийлөгч Цахиагийн Элбэгдорж талархлын үгэндээ “Ази, Номхон далайн “Рицүмэйкан” их сургуулийн ерөнхийлөгч, удирдлагууд, энд хүрэлцэн ирсэн эрхэм хүндэт хатагтай ноёдын амгаланг айлтгая.

Нэр хүндтэй “Рицүмэйкан” их сургуулийн “Хүндэт доктор” цолыг хүртэж байгаадаа туйлын баяртай байна. Хүмүүнлэгийн болон энхтайвны зорилгыг урдаа тавьсан Ази, Номхон далайн “Рицүмэйкан” их сургуулийн үйл ажиллагаа зөвхөн Япон улсад төдийгүй бүс нутагтаа нэр хүндтэй сургууль гэдгийг бид сайн мэддэг. 2000 оноос хойш Монгол Улсаас 250 оюутан энэ сургуульд суралцсан гэдэг нь үнэхээр бахархам сайхан амжилт юм. Мөн энэ их сургууль манай улсын Шинжлэх ухаан технологийн их сургууль болон бусад сургуулиудтай хамтарч ажилладгаараа онцлоготой.

Монгол Улсын ирээдүй бол эрдэм мэдлэгтэй, нээлттэй залуу үе гэж бид итгэж явдаг. Энэ ирээдүй үеийг бэлтгэхэд Монгол Улсын Засгийн газар, Япон Улсын Засгийн газар их анхаарал тавьж байдгийг хэлэхэд таатай байна. Ер нь Япон улсад суралцсан, мэргэжил дээшлүүлсэн монголчуудын тоо хэдэн мянгаар тоологдоно. Хоёр улсын Засгийн газар 1000 оюутныг инженерийн мэргэжлээр Япон улсын их дээд сургуулиудад сургах хөтөлбөр хэрэгжүүлж эхэлж байгаа. Энэ нь Монгол Улсыг цаашид мэдлэгийн эдийн засаг руу, өндөр технологийн эдийн засаг руу шилжүүлэхэд асар их үүрэг гүйцэтгэнэ гэж үзэж байна.

Би өчигдөр болсон “Азийн ирээдүй” олон улсын хуралд оролцож үг хэлэхдээ “Азийн НҮБ-ын гишүүн 48 орон нийлж хамтарч, нэгдсэн хамтын ажиллагааны байгууллагатай болох” санаачлагыг дэвшүүлсэн. Ази тивд оршиж байгаа улсууд бие биенийхээ тусгаар тогтнож, сонгож авсан замыг хүндэтгэж, эрх тэгш байдлаар ярилцдаг олон улсын механизмыг Азид бий болгоё гэсэн санаачлагыг мөн дэвшүүлсэн. Энэ нь Азид аюулгүй байдал, энх тайвныг бататгах, яриа хэлцлийн замаар асуудлаа шийдэхэд үүрэг гүйцэтгэнэ гэж бид итгэж байгаа.

Монгол Улсын зүгээс бүс нутагт оруулж байгаа бидний хувь нэмрийг үнэлж, “Рицүмэйкан” их сургууль өнөөдөр нэр хүндтэй “Хүндэт доктор” цол олгож байгаа нь Монголын ард түмэнд олгож байгаа хүндэтгэл юм гэж би хүлээж авч байна. Цаашдаа хоёр орны боловсролын салбарын харилцаа улам өргөжих болтугай гэж ерөөе. Номын цагаан буян үргэлж дэлгэрч байхын ерөөлийг өргөн дэвшүүлье. Баярлалаа” гэж хэллээ.

Тус сургууль нь 1869 онд үүсгэн байгуулагдсан “Рицүмэйкан Академи”-ийн бүрэлдэхүүн хэсэгт багтдаг. Жилд 20 000 оюутан шалгалтад ордогоос 3000 оюутан шалгаруулж авдаг. Олон улсын менежментийн сургууль, Ази,номхон далайн сургууль гэсэн хоёр салбар сургуультай.

“Рицүмэйкан” Их сургууль нь 2006 онд Монголын Менежментийн Академи,2008 онд МУИС,ШУТИС-тай тус тус хамтын ажиллагааны Санамж бичиг байгуулсан. Улаанбаатарын Элит, Монгол-Туркийн хамтарсан ахлах сургуультай мөн хамтран ажиллаж байна.

Сүүлд шинэчлэгдсэн ( 2015 оны 5-р сарын 25, Даваа гариг, 08:45 )

Хуудас 8-с 1
<< Эхлэх < Өмнөх 1 2 3 4 5 6 7 8 Дараахи > Төгсгөл >>

Мэдээллийн хуанли

< 2015 оны 5-р сар >
Да Мя Лх Пү Ба Бя Ня
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

АСЕМ


Холбогдох

Хаяг: Монгол Улсын Гадаад Хэргийн Яам
Энх тайвны гудамж-7А, Улаанбаатар 14210, Монгол Улс
Шуурхай утас: 00(976) - 62262222
Факс:
00(976)-11322127

Консулын болон визийн асуудлаар
и-мэйл: kg@mfa.gov.mn

Мэдээлэл, Гадаад сурталчилгааны асуудлаар
и-мэйл: press@mfa.gov.mn

Ёслолын газар
и-мэйл: protocol@mfa.gov.mn

Ерєнхий асуудлаар хандах
и-мэйл: info@mfa.gov.mn

АЗA Монголд